Молитва святителя Амвросия Медиоланского пресвитером, готовящимся к служению Святыя Литургии

(сокращенный вариант)

+

Проскомидия. Трапезный храм Киево-Печерской Лавры.

Архиерею Истинный Иисусе Христе, Духом Твоим научи мя, недостойного раба Твоего, егоже в чин священства, не по делом моим, но по Твоей милости призвал еси, Божественное священнодействие совершати с благочестием и благоговейным страхом.

Любителю чистоты и целомудрия, погаси в плоти моей весь пламень страстный, да чистым сердцем возмогу Тебе принести жертву хваления со страхом и трепетом, слез излиянием, в радости духовней и веселии Божественном. Очисти мое сердце от нечистых, мерзких, праздных и вредных помышлений. Избави меня от духа гордыни, тщеславия, зависти, блуда и нечистоты.

Приими, Господи, жертву о Церкви Святей Твоей и о всем мире, научи нас молитися, призри на скорби людей, плененных воздыхания, страдания убогих, нужды путешествующих, немощных скорби, старых немощи, рыдания младенец, обеты дев, воздыхания вдов, сирот умиление и молитвы рабов Твоих в храме сущих.

Отче Святый, да будет душам верных преставльшихся во избавление, спасение, отраду и вечное веселие сие великое благочестия таинство.

Молю, Господи, благость Твою, да приидет на Хлеб сей и Чашу сию исполнение Божества Твоего, да снидет Святого Духа образ невидимый, Иже и приношения сия наша сотворит Тело и Кровь Твою, и да будет ми Причастие сих Таинств во освящение и обожение, сладость, исцеление всякого недуга, всегдашнее хранение души и тела здравие.

Отжени от мене ненавидящих мя, да, Тобою огражден, с Тобою вниду в вечное Твое царствие, идеже лицем к лицу Тебе узрим, и тогда насыщуся, внегда явит ми ся слава Твоя, в нейже царствуеши со Отцем и Святым Духом во веки. Аминь.

[Источник: Служебник. Изд. МП, М, 1977, ч. 2-я, с.589-596]