МОЛИТВА ПРАВОСЛАВНЫЯ ЖЕНЫ О НЕВЕРУЮЩЕМ МУЖЕ

Господи Боже наш, предстательством Богородицы, услыши молитву сию!

Господи Боже наш, Иже в раю благословивый праотца Адама и жену его Еву, благослови любовию совершенною и твердым единомыслием в вере и благочестии супруга моего и мя [со чадами], да поживем по воли Твоей!

Очисти мя, недостойную, от всякия скверны плоти и духа, украси нетленою красотою кроткого и молчаливого духа, послушанием и разумом духовным, услыши во благо моление сие. Помози мне по молитвам Пречистыя Богоматери и Ея матери святыя Анны, праведных супружницы Захариины Елизаветы, Моники и Нонны, Ксении Петербуржския и всех благоверных жен повиноватися мужу во благо, да он, видя чистое и богобоязненное житие мое, уверует во Христа Сына Божия и станет истинным чадом Церкви.

Призри на раба Твоего, мужа моего [имя рек], да подклонит он Тебе свою главу во смирении, [аще некрещен есть: и сподобится во время благополучное Крещения и начала новыя жизни во Христе, оставления грехов и одежди нетления], просвети ум его светом святого Евангелия Твоего, сопричти его избранному Твоему стаду и соедини его Святей Соборней и Апостольстей Церкви, даждь ему благодатные дары Таинств Покаяния и Причащения Тела и Крови Христа Твоего, напиши его в книзе жизни Твоея.

Благослови миром входы и исходы, дела и покой мужа моего; Ангел Хранитель да не отступен будет с ним, охраняя от демонов, от мечтаний лукавых, [аще одержим есть: пианства] и прелести.

Даждь ему силы телесные на многая и благая лета, сподоби его прияти достойные плоды трудов своих с радостию и благодарением, исцели всякий недуг, избави от роптания и иных страстей.

Да жительствуя по заповедям Твоим, сотворим церковь домашнюю и прославим Отца и Сына и Святаго Духа во веки веков. Аминь.